Llythyr Croeso Prif Swyddog Gweithredol

Diolch i chi am gymryd yr amser i ymchwilio'r cyfle hwn i ymuno â Bwrdd Iechyd Prifysgol Bae Abertawe ar adeg hollbwysig.

Mae ein huchelgais yn glir: creu Bae Abertawe iachach, lle mae pobl yn byw'n dda ac yn heneiddio'n dda, wedi'i gefnogi gan ofal o ansawdd uchel sy'n dosturiol, yn deg ac yn cael ei ddarparu mor agos at adref â phosibl.

Mae ein cenhadaeth — Iechyd Gwell, Gofal Gwell, Bywydau Gwell — yn adlewyrchu ein hymrwymiad i atal, ymyrraeth gynnar, gweithio mewn partneriaeth a gwelliant parhaus.

Ond rydym hefyd yn onest ynglŷn â'r heriau sy'n ein hwynebu er mwyn cyflawni'r nodau hyn.

Fel systemau iechyd ledled Cymru a'r DU, rhaid inni gydbwyso'r galw cynyddol, anghydraddoldebau iechyd parhaus, cyfyngiadau gweithlu ac ariannol â'r angen i drawsnewid ein gwasanaethau ar gyflymder er mwyn diwallu anghenion ein cymunedau yn well.

Rydym wedi gwneud cynnydd pwysig, gan gynnwys gwelliannau mewn gofal wedi'i gynllunio, ond mae gennym fwy i'w wneud er mwyn lleihau amrywiad a gwella ansawdd a phrofiad cyffredinol cleifion a staff.

Fel uwch arweinydd yn ein Bwrdd Iechyd, byddech chi'n ymuno â ni ar adeg pan fo arweinyddiaeth weladwy, sy'n cael ei harwain gan werthoedd, yn allweddol i gyflawni ein nodau.

Drwy Trefnu i Lwyddo, rydym yn alinio ein strwythurau, ein trefniadau arweinyddiaeth a'n model gweithredu â'n strategaeth, gan gryfhau atebolrwydd o'r Bwrdd i'r Ward a galluogi mwy o benderfyniadau dan arweiniad clinigol. Ochr yn ochr â hyn, bydd Trawsnewid ar gyfer y Dyfodol — ein Cynllun Gwasanaethau Clinigol wedi'i adnewyddu — yn nodi model gofal sy'n gadarn yn glinigol ac yn gynaliadwy yn ariannol.

Rydym yn chwilio am rywun sy'n dod â barn strategol, cyflymder, gostyngeiddrwydd ac ymrwymiad cryf i werthoedd gwasanaeth cyhoeddus.

Bydd angen i chi fod yn gyfforddus yn arwain drwy gymhlethdod, gweithio ar y cyd ac adeiladu ymddiriedaeth, wrth ein helpu i wneud y dewisiadau anodd sy'n ofynnol i ddarparu gofal diogel, cynaliadwy ac o ansawdd uchel.

Bydd cleifion, staff a chymunedau wrth wraidd pob penderfyniad a wnewch.

Os yw hyn yn eich cymell, hoffwn dderbyn eich cais.

Diolch am eich diddordeb ac edrychaf ymlaen at glywed gennych.

Abigail Harris
Prif Weithredwr
Bwrdd Iechyd Prifysgol Bae Abertawe